AP-ah firm ṭhen-khat khar dawn
Arunachal Pradesh State Pollution Control Board (APSPCB) chuan state chhunga industry ṭhenkhat, phalna nei loa din te kharna tur thupek Nilaini khan an chhuah.
He hmalakna hi Water (Prevention & Control of Pollution) 1974, Air (Prevention & Control of Pollution) 1981 leh Environment (Protection) Act 1986-te denchhena tih a nih thu an tarlang bawk.
Pollution control board thuchhuah chuan Water Act 1974, Air Act 1981 leh Environment Protection Act 1986 hnuaiah hian hotel ṭhenkhat leh lung lakna quarry ṭhenkhat te chu khar an ni dawn tih an tarlang.
APSPCB chuan an thuchhuah hi an ngaih thutak thu sawiin district hrang hranga deputy commissioner-te chu an district chhung ṭheuha uluk taka enfiah turin leh company awm te chu phalna nei thlapa awmtir turin an ti bawk.
Board chuan power bakah public health engineering & water department-te chu phalna nei lo company din te hnenah supply pe lo turin an ti nghal a ni.
APSPCB thuchhuah chuan an thupek zawm duh lo te chu Supreme Court of India leh National Green Tribunal-te thuchhuah zawm duh lo anga an ngaih dawn thu leh thuneitu sang zawk hnena an chungchang thlen an tum thu an sawi a, an chungah action lak a nih dawn thu an tarlang bawk.