Tripura Assembly Speaker a bang

Tripura chief minister Biplab Kumar Deb-a'n a cabinet a tihlen hnu lawkah, Assembly speaker Rebati Mohan Das chuan Speaker a nihna aṭanga banna a thehlut.

Rebati Mohan Das chuan Ningani khan Speaker a nihna aṭanga a ban thu hi a sawi a, mimal thil vanga bang a nih thu leh, mipui hriata a puanzar theih loh thu a sawi.

BJP hruaitu hian deputy speaker Biswa­bandhu Sen hnenah banna hi a thehlut. Das chuan, "Ka mawhphurhna min chhawk tur hian hun rei tak ka lo ngen fo tawh a ni. Speaker aṭanga banna ka thehluh avangin MLA ka nihna leh BJP member ka nihna aṭangin ka bang tihna a ni lo," tiin BJP chu a chak chhoh zel a duh thu a sawi bawk.

Speaker aṭanga banna a thehluh hnuah Das hi Tripura state BJP unit vice president atan ruat a ni tih state BJP president Manik Saha chuan a sawi nghal.

Kum 2016 khan Das hian CPI(M) chhuahsanin BJP hi a zawm a, state assembly inthlanah Pratapgarh bialah BJP ticket-in a ding zui a ni. BJP-IPFT ṭangrual sorkarah Assembly Speaker-ah dah a ni. Mahse assembly session a kaihhruai danah sawisel a tawk fo a, BJP party MLA-te ngei pawhin an sawisel a ni.

State assembly session hi September chawlhkar tawp berah neih a ni dawn a, Speaker thlak tur hian Deputy Speaker Biswabandhu Sen leh MLA Ratan Chakraborty-te hming sawirik a ni.