TMC-in Tripura-ah survey neih a tum

Trinamool Congress (TMC) chuan Tripura-a an party dinhmun sawhnghet tumin hma an la chhuznawm zel a, party hruaitu Sushmita Dev chuan survey neih an tum tih a sawi.

TMC hian state assembly inthlan neih hunah rorellai, BJP leh a thawhpuite chu paihthlak ngei an tum a, tun hnaiah an party hruaitute pawhin hma lak dan tur enin Tripura hi an lo tlawh fo tawh a ni. Dev bakah All India Trinamool Congress General Secretary, Abhishek Banerjee leh West Bengal Education Minister Bratya Basu-te pawh ṭum eng emaw zat an kal tawh.

Sushmita Dev chuan, "Mamata Banerjee thupek angin, kan pawl thuam chak tak dan tur ngaihtuain ground-level survey kan nei dawn a ni," a ti. Survey report chu Abhisek Banerjee hnenah an thehluh tur thu a sawi.

Tripura mipuite chuan TMC chu an lo dawngsawng ṭha hle tih sawiin, Dev chuan thla reiloteah hma an sawn chhoh ngei a rin thu a sawi. Ram pumah Modi duh lohna thli a tleh mek a ni tiin, zirchianna neih hnuhnung berah pawh prime minister Narendra Modi larna pawh a tlahniam tawh hle tih a sawi a ni.

TMC hian West Bengal-a assembly inthlan neih dawn khan state chhung politics dinhmun thlirin survey hi an lo buatsaih tawh bawk a, an zirchianna neih denchhen hian constituency tam takah candidate an siam pawh thlakin, inthlanah hian an che ṭha zui hle. Dev chuan Tripura-a district pariatah membership drive leh party programme pawh an buatsaih chhoh tur thu a sawi.