Manipur sorkar in a dinhmun tichiang dawn

Manipur sorkar chuan United Naga Council (UNC) in April 10-a dis­trict pasarih siam tur sut leh tura a phut chung­changa a dinhmun a tihchiang dawn tih official-te chuan Zirtawp­ni khan an sawi.

Mnaipur sorkar, UNC leh sorkar laipui hian an pathuma Senapati district-a inbiakna an neih ṭumin inremna an ziak tawh a, Manipur sorkar chuan sorkar laipui leh UNC hnenah hian hemi chung changa an dinhmun an tihchiang vat dawn a ni.

Manipur-a O Ibobi Singh-a kaihruai Cong­ress sorkar in district thar pasarih siam belh tura thutlukna a lo siam tawh chu UNC hian an duh lo hle a, sut leh turin sorkar hi an phut a ni.

An thil ngiat tih­hlawhtlin nan hian Naga tamna distrcit, Senapati, Tamenglong, Ukhrul leh Chandel-ah te November 1, 2016 aṭang khan kawng an dang a, state eco­nomy nasa takin a nghawng nghe nghe. Sorkar laipuiin a ngenna angin March 19, 2017 khan an kawng dang hi an tlangtir leh chauh a ni.

N Biren Singh kaih­hruaina BJP sorkar chu Manipur-ah a din tak avangin district ṭhiat tura ngiattute hian sorkar lakah beiseina an nei sang hle.

Inbiakna neihnaah hian Manipur sorkar ai­awhin V Hangkhanlian, Agriculture Minister, N Kayisii, Tribal and Hill Areas Development Mi­nis­ter lehThokchom Radhe­shyam Singh, Educa­tion Minister-te an tel a ni.

UNC aiawh hian pre­sident Gaidon Kamei, gene­ral secretary S Milan, All Naga Students Union president, Manipur Seth Shatsang leh Naga Women’s Union president Asha Wungnam-te an tel thung a, sorkar laipui aiawh hian ministry of home affairs joint secretary (north east), Satyendra Garg-a tel thung.