Sorkar laipui, Assam sorkar leh Karbil pawl 5-in Peace Accord ziak

Sorkar laipui, Assam sorkar leh Karbi Anglong pawl pangate chuan Inrinni liam ta khan Delhi-ah Karbi Peace Accord a ziak a, he hunah hian union home minister Amit Shah, Assam chief minister Himanta Biswa Sarma leh Karbi pawl aiawhte an tel.

Home Minister chuan prime minister Narendra Modi kaihhruai sorkar chuan hun rei tak buaina lo awm tawhte chinfel a, Assam inpumkhatna siam chu a tum a ni tiin, Karbi Anglong Agreement ziah a ni ta chu thil chhinchhiah tlak a ni, a ti.

Assam CM chuan inremna an ziah chu Assam tana hriatreng tur a nih thu sawiin, inremna an siam angin Karbi hnam chu ram danpuia Sixth Schedule hnuaiah chanpual an nei thei dawn tih a sawi.

Amit Shah pawhin KAAC tan hian development project Rs vbc 22 hu bakah, Rs vbc 325 hu project thar 32 siam a ni leh dawn tih a sawi. Kum nga chhunga state sorkar chuan Karbi hnam chenna bial tihhmasawnna turin cheng vaibelchhe 1,000 a ruahman dawn a, hei hi thawh ngaa pein, thawh khatah Rs vbc 200 zel Assam budget kaltlangin pek an ni ang tih a sawi bawk. Hei bakah hian Karbi Anglong Autonomous Council (KAAC) tana fund dang pek dan tur pawh sawiho a la ni leh ang.

Kumin February thla kha khatih laia Assam CM Sarbananda Sonowal hmaah Karbi helpawl panga member 1040 chu an lo inpe tawh a ni. Hel inpete hi People's Democratic Council of Karbi Longri (PDCK), Karbi Longrii NC Hills Liberation Front (KLNLF), Karbi People's Liberation Tiger (KPLT), Kuki Liberation Front (KLF) leh United Peoples Liberation Army (UPLA) member-te an ni. Heng pawl hrang hrangte hian state hran an ngiat a ni. Karbi hel inpeten ralthuam an pek luh zingah hian M-16 rilfe 11, AK-47 rilfe 58 bakah silai mu ṭhahnem tham tak a tel a ni.