Assam border issue : Meghalaya regional committee meeting hmasa ber nei

Meghalaya sorkarin Assam-Meghalaya ramri buaina chungchang buaipui tura a din, regional committee pathumte chuan kar liam ta Zirtawpni khan meeting hmasa ber an nei.

Meeting-ah hian deputy commissioner (DC) te chu ramri buaina hrula awm khaw hrang hrangte dinhmunte, khaw chhung mipuite ngaihdante report tura tih an ni. Ri-Bhoi, West Khasi Hills leh Jaintia Hills DC-ten report an pe a ni.

Chief minister Conrad Sangma chuan meeting-ah hian committee chairman - deputy chief minister Prestone Tynsong, cabinet minister - Renikton Lyngdoh leh Snaiwbhalang Dhar te an tel tih a sawi.

CM chuan meeting chu Assam nena ramri buaina an neih mek chinfelna ngaihtuah tura an hmalakna a ni tih sawiin, thil tam tak ngaihtuah tur a la awm tih a sawi a ni.

Regional committee-te hian an tih tur bituk hrang hrangte an tih hnuah state sorkar chuan meeting a neihpui leh dawn a, committee-te hian a hranin meeting pawh an nei leh dawn bawk a ni.

Sangma chuan, "Assem­bly session a zawh hunah joint meeting neih leh a ni maithei. Regional committe-te pawh hian ramri hi a huhoin an tlawh dawn a ni," a ti. Official-te chuan a hmain ramria khuate hi tlawhin, khawchhung mite pawh an lo kawm tawh tih a sawi bawk.