Karbi Peace Accord ziah inbumna niin puh ; Assam-a pawl 24 ten lungawi lohna an lantir

Sorkar laipui, Assam sorkar leh Karbi Anglong pawl panga-ten kar liam ta Inrinnia inremna, Karbi Peace Accord an ziah chu inbumna mai nia sawiin, Assam-a indigenous organisation 24-te chuan Pathianni khan lungawi lohna an lantir.

Pawl hrang hrang intelkhawmte chuan union home minister Amit Shah chu Constitution-a Article-244(A) hnuaiah hill district - Karbi Anglong, West Karbi Anglong leh Dima Hasao-te chu 'autonomous state'-a puang turin an phut.

Forum convener, Abinash Ronghang chuan, "Inremna ziahah hian thil pawimawh ber, Article-244(A) chungchang chu BJP sorkar chuan a sawilang tel duh lo a, sawiho pawh a ni lo," tiin a sawi. Member-te hian Karbi Anglong headquarters, Diphu-ah lungawi lohna kawngzawh hi huaihawtin, Peace Accord ziah chu an thlawp loh thu an aupui a ni. Pungkhawmte hian Accord an duh loh thu aupuiin, tyre-te an hal a ni.

Ronghang chuan Peace Accord hian Karbi Anglong Autonomous Council (KAAC)-a council seat 10 chu category dang tan a hawnsak zawk nia sawiin, hei hi an duh lo tih a sawi."KAAC-a seat awm zawng zawng chu Karbi Anglong-a tribal-te tan dah vek zawk tur a ni. Sixth Schedule area-a seat reservation lo siam ṭulna hi a awm lo. Seat 10 hi min laksak a, hnam dang tana kawng hawn an tum zawk a ni," a ti.

Inrinnia Accord an ziahfel hnu khan Assam chief minister Himanta Biswa Sarma chuan KAAC-a seat awm zat chu 50-ah tihpun a ni dawn tih a sawi a, heng zinga member paruk chu Govenor-in a ruat ang a, a bak member 44-te chu mipuiten an thlan chhuah tur a nih thu a sawi. "Seat 10 chu open category niin, seat 34 chu Scheduled Tribes tan dah a ni ang," tiin a sawi. Mahse he ruahmanna hi forum hian an pawm lo a ni.