Assam-ah school leh college hawng ṭan

Assam sorkar chuan nimin aṭang khan state chhunga school leh college-te a hawng ṭan.

Higher secondary, graduation leh post-graduation-a final year zirlaite chu nimin aṭang khan an kal ṭan a, hetihlai hian Class 1-11, graduation-a final semester tih loh semester dang zawng leh post-graduation-a first-year zirlaite erawhin online class an la neih chhunzawm ang.

State sorkar chuan zirna in hawn chungchanga kaihhruaina hi siamin, zirlaite chu class kal tura nawr lui loin anmahni duhthlanna ngeia kal tura tih an ni a, hei bakah zirna in awmna district-a Covid-19 positivity rate awmdan pawh ngaihtuah tel tur a ni bawk. Zirlai kal tura tih zingah online mode-a kal duh zawk an awm pawhin an duh dan anga kaltir tura tih an ni.

Sorkarin kaihhruaina a siamah hian district chhunga positivity rate chu 2% chunglam a nih chuan deputy commissioner-te chuan zirna inte chu an khar vek tur a ni a, positivity rate hi 2% hnuai lam a nih hma chuan khar chhunzawm tur a ni.

School hawn ṭan aṭanga ni thum chhung chu zirlai kum 18 chunglam te bakah zirtirtu leh non-teaching staff vaccine la tawh chauh kal tura tih a ni. Class section tinah chuan zirlai 30 aia tam awm loh tur a ni a, class teacher-te chuan zirlai an tam a nih chuan section an siam belh ang. Hostel-te chu physical class-a kal zirlaite tan chauh hawn tura tih a ni bawk. Zirlai leh zirtirtute hi nitin an zirna in an luh dawnin thermal screening neihsak ziah an ni ang.

Sikkim-a Class 9 leh a chunglam zirlaiten school kal ṭan
Sikkim-ah pawh nimin aṭang khan Class 9 leh a chunglam zirlaite chuan school leh college an kal ṭan bawk.

Hri leng thawh hnihna thleng vanga March aṭanga thla ruk chhung zirna in khar a nih leh hnuah, sorkar school/college, government aided leh private institution-te chu hawn ṭan a ni a, Class 8 hnuai lam erawh la khar chhunzawm a ni a, online class emaw, home school angin emaw kalpui an la ni ang a, zirtirtute chuan institution hotu hnenah kartin report an thehlut thung ang.

Zirna in hawn chungchanga state education department-in hriattirna a tihchhuahah, additional chief secretary GP Upadhyaya chuan zirlai school kal turte hian an nu leh pate aṭangin an remtihna lehkha an ken tel vek a ngai tih a sawi. Ṭum khatah class khatah zirlai awm zat aṭanga 50% chin awm phalsak an ni.