Sorkar laipuiin Tripura tan Rs vbc 493 pechhuak

Union finance minister Nirmala Sitharaman-i'n Tripura a tlawh ṭuma tribal area leh a ram leilung fate chawikan leh tihhmasawnna atana special package, cheng vaibelchhe 1,300 pek an nih tur thu a puan hnuah, first installment Rs vbc 493 pek chhuah an nih thu chief minister Biplab Kumar Deb chuan a sawi.

Pathianni khan sorkar laipuiin first installment a pek thu hi CM chuan a sawi a, Tripura sorkarin tribal-te tihhmasawnna tura a hmalak dante chu Union Finance Minister chuan ṭha a ti hle tih a sawi bawk. Sorkar laipuiin special package a siam hi leilung fate dinhmun chawikanna tur leh, tribal area-a infrastructure tihchangtlunna atana ruahman a ni.

CM Deb chuan sorkar laipui hmalakna chu lawmawm a tih thu sawiin, Finance Ministry hian kar liam ta khan an state tan project pahnih, cheng vaibelchhe 21 hu chu a pawmsak bawk tih a sawi. Project pawmsak hi state highway zauhna tur leh Agartala-a infrastructure enkawl zuina turte a nih thu a sawi bawk.

Hmarchhak state-a hri leng dinhmun leh vaccine semchhuah hna kalpui dante an thlirho hnuah, union health minister Mansukh Mandaviya chuan Tripura tan Rs vbc 93.02 a lo pe chhuak tawh a, union rural development minister Giriraj Singh pawhin Pradhan Mantri Awas Yojana (Rural) hnuaiah chenna in nuai 1.59 sakna tur pawh a sanction sak tih CM chuan a sawi.