Assam tuilianin ziaawm lam a pan

Assam-a tuilian chuan ziaawm lam a pan a, Brahramaputra lui leh a peng hrang hrangah tuilian pawh a kiam ṭan tawh a, hetihlai hian Thawhṭanni khan Morigaon district-ah tuilian vangin naupang pakhat a thih belh leh.

Assam State Disaster Management Authority (ASDMA) in a tarlan danin, Thawhṭanni khan Morigaon-a tuilian chuan naupang pakhat lain a thi tih a sawi a, state chhunga tuilian vanga thi hi mi pariat an tling tawh a ni.

District 12-a cheng mi 43,000-te chuan hun eng emaw chen chu tuilian vang hian harsatna an tawk tawh a ni. Golaghat district chu tuilian tuar nasa ber niin, mi 29,857-ten harsatna an tawk a, Morigaon district-a cheng mi 10,536-ten tuilian hi an tuar bawk. Tuilian tuarte tan sorkar chuan district paliah rilief camp 14 siamin heng hmunah hian mi 718 an la khawsa mek.

Kaziranga National Park leh Tiger Reserve-a tulian vangin samak pahnih an thi tawh bawk a, camp 223 zinga 21 chu tuilian hian a la chim mek bawk. Park official chuan tuilian vang hian samak bakah hog deer 17, swamp deer pahnih, wild buffalo leh cap langur pakhat an thi tawh bawk tih a sawi.

Tuilian hian hmun hrang hrang kawngpui,lei leh infrastructure dangte a tichhe nual a, thlai chinna ram hectare 15,981-a zau pawh a chim bawk a ni.