Tripura-a BJP leh CPI(M) worker-te intihbuainaah mi 6 an hliam

Tripura-a Sepahijala district-a Dhanpur area-ah Thawhṭanni khan BJP leh CPI-M worker-te inkarah buaina a chhuak a, mi parukin hliam an tuar.

CPI-M hruaitu leh chief minister hlui Manik Sarkar chu Kathalia-ah hun hmang turin a kal a, mahse a convoy chu BJP mi leh sa nia sawi mi ṭhenkhatin kawng lakah an lo dang a, CPI-M worker-te chu he hmunah hian kal ve nghalin an intibuai zui ta a ni.

Sarkar hi CPI-M MLA pahnih, Shahid Chowdhury leh Shyamal Chakraborty-ten an ṭawiawm a, anmahni lo dangtute hian Manik Sarkar hi a rawn kalna kir leh turin an lo aukhum a ni.

Sonamura Sub-divisional Police officer (SDPO) Banoj Biplab Das chuan party pahnih worker-te inkara buaina chhuak vang hian mi parukin hliam an tuar a, BJP local party office pawh tihchhiat a ni tih a sawi bawk. Buaina chhuak vang hian SDPO chuan CPI-M hruaitute chu an kal tumna lamah kaltlang lo turin a ti a, mahse CPI-M worker-te chuan an hruaitute hi vengin an kaltlangpui niin a sawi.

Kathalia an thlen hnuah eptu hruaitu Sarkar chuan BJP-ten lo danchak a tum chungah an programme kaltlangpui a ni thei leh, he hun hmanpuitute chungah lawmthu a sawi. Sarkar chuan an do let ve zel a ngai tih sawiin, party worker-te pawh hun lo kal zel turah beidawn leh tlawm mai lo turin a chah zui bawk.

Hetih lai hian BJP sorkara minister atana lakluh thar, Sushanta Chowdhury chuan BJP headquarters-a press conference a neihah eptu hruaitu hi buaina chawk chhuak tura fuihtuah a puh thung.