Meghalaya : Mawlai-ah lungawi lohna lantir chhunzawm

Meghalaya police-te kuta HNLC hruaitu hlui, Cheristerfield Thangkhiew a thih danah lungawi lohna leh Thangkhiew tana rorelna dik an phutna lantirin Shillong-a 'Voice of the People of Mawlai' chuan Thawhṭanni khan kawng dangin nawrh an huaihawt leh.

Mawlai bial mite leh pawl hrang hrang hruaitute chuan choka chemte, 'tari' an tih chu kengin lungawi lohna hi an lantir a ni.

August 13-a Me­gha­laya police-ten Thangkhiew chenna in an dapa an kahhlum ṭum khan, Thangkhiew hian choka chemte nen a lo bei a, hei vang hian an invenna atan silaiin an kap ta niin police-te chuan an sawi. Thangkhiew hi silaia an kahna hliam tuar loin a thi zui a, August 15 khan vui a ni.

Chemte kenga nawrh huaihawt a nih avang hian district thuneitute chuan show-cause notice pe nghalin, health protocol an bawhchhia tih an hriattir. Mahse nawrh huaihawtte hian lehkha an pek hi an halzui a ni.

Mawlai circle-a Hy­n­niew­trep Youth Coun­cil (HYC) presi­dent Donboklang Kharlyngdoh chuan an nawrh huaihawt avanga jail tan a ṭul a nih pawhin a inhuam tih a sawi a, mahse Thangkhiew thahna a nihnaa inhnam­hnawih police-te chu suspend ngei an phut thu a sawi. Chemte an ken chu police-te thusawi an awih lo tih lantirna mai a nih thu leh, police-te beih tumna a nih loh thu a sawi bawk.

Kharlyngdoh chuan, "He thil hi Cheristerfield-a'n choka chemte nena lo beih a tum avanga police-ten silaia an kah tak thu sawitu, assistant inspector general of police GK Iangrai laka ka lungawi lohzia lantirna a ni. A thusawi hi awmze nei lo leh pawm tlak loh hulhual a ni," a ti.