AP-a 'Air gun Surrender Abhiyan' hnuaiah Mi 2,000 chuangin silai tung tawh

Aruanchal Pradesh sorkarin an state-a nungchate humhalhna tura ramvah tihtawp a nih theihna tura 'Air gun Surrender Abiyan' a kalpui hnuah kumin March thla aṭang khan mi 2,000 chuangin silai an tung tawh.

State environment and forests minister Mama Natung chuan he programme hnuaiah hian mipuite chu nawr luih ni loin anmahni duh thu ngeia duhthlanna siam tur an ni tih a sawi. "Nungcha humhalh chunchanga inzirtirna ṭha neih kan duh a ni. Arunachal ram square km 83,743 zinga 80% chu forest area a ni a, hengah hian sava leh ramsa chi hrang hrang 500 vel an awm a, hmuhchhuah loh pawh eng emaw zat an awm hial maithei. Heng nungchate hi kan tihlum zel a nih chuan ka ramngawte pawh hi an la bo mai dawn a ni," a ti.

District thuneitute, forest department official, NGO leh community-based organisation (CBO)-te nen thawkhoin, ramngaw leh nungchate humhalh pawimawh ziate inzirtirna an kalpui tih minister chuan a sawi bawk.

'Air gun Surrender Abhiyan' hi March 17 khan East Kameng district-a Lumdung-ah hawn niin, programme hawn ṭanni hian airgun 46 thehluh a ni. Silai thehlutte hi sorkar chuan certificate of appreciation a lo hlan zel a ni.

Minister chuan an ṭhenawm, Assam leh Nagaland sorkar hnenah pawh an state chhunga nungcha thah ṭhin chu veng tura hma la turin a ngen bawk. An ṭhenawm state-ten hma an la ve lo a nih chuan AP mipuite hmalakna ringawt chu a tawk zo dawn lo a ni, a ti.