NIA-ten Nagaland Official pathum man

National Investigation Agency (NIA) chuan Pathianni khan Naga hel pawl National Socialist Coun­cil of Nagaland (Khap­lang) kuta sorkar sum pe-a puh Nagaland sorkar official hlun pathum an man.

Hetih lai hian Nagaland Chief Minister hlui TR Zeliang pawh NIA hian state assembly neih zawh velah koh an la tum bawk a, Zeliang pawh hi hel kuta pawisa petua puh zingah a hming sawilan a ni.

Pathianni-a mante hi G Ikuto Zhimomi (Director, Directorate of Agriculture, Kohima), Ketouzo Peseyie (executive engineer in state rural development depart­ment) leh Sangtemchuba (divi­sional accounts office in Naga­land’s urban development depart­ment)-te an nih thu official thuchhuah chuan a tarlang.

Alok Mittal, Inspector Gene­ral of Police, NIA chuan a chunga hming tarlan mi pathum te hian NSCN(K)-te hmalakna leh pawikhawihna te an thlawp tih sawiin sum leh pai ten an ṭanpui ṭhin tih a sawi.

Mittal chuan kum 2012-16 chhung khan hel pawl hrang hrang NSCN (K), NSCN (R), NNC-te hnenah sum tam tham tak pek a nih thu a sawi a, NIA-ten January 18, 2017-a sorkar office 13 an dap naa official document, demand letters leh payment receipt an hmuh aṭang tein heng thil hi hmuhchhuah a nih thu a sawi bawk.

Thudawnnain a tarlan dan chuan hel pawl hnena pawisa pekna chungchanga inhnamhnawiha signature leh kutziak awmte chu CFSL Gandhinagar in an tichiang tawh a ni.

NIA hian hel pawl hnena pawisa pek kaihhnawihah hian Nagaland sorkar official 10 an man tawh a, NIA thudawnnain a tarlan danin NSNC(K) hnena pawisa petu zingah hian Chief Minister TR Zelianga hming pawh a lang tel a ni.

NSCN(K)-te kutah hian kum li chhungin sokar pawisa cheng vaibelchhe 20 vel pek a ni tih NIA chuan an sawi. NSCN(K) finance incharge S Khetoshe Sumi pawh nikum khan man a lo ni tawh bawk a ni.