Manipur sorkar hnathawk la nawrh chhunzawm ; Contract-a thawk te hna chhunzawm tir dawn

Manipur sorkar hnuaia hnathawk, hlawh san phut vanga hna thawk loa office kal te chuan an nawrh an la chhunzawm zel avangin Manipur Chief Minister N. Biren Singh chuan Thawhṭanni khan sorkar chuan contract-a thawk te chu financial year a tawp tawh dawn avangin financial file khawih tura an chhawr dawn thu a sawi.

Biren Singh chuan nimin aṭang khan contract-a thawk te chu hna hi an khawih tir dawn thu a sawi a, sorkar chuan mipuite tana a hnathawh a chhunzawm zel dawn a ni, a ti.

Sorkar hnathawk te hian kar liamta Ningani aṭang khan 7th Pay Commission hman hun tur tichiang tura sorkar nawrin tiam chin awm lo in nawrh an huaihawt a ni.

Chief Minister chuan state chhunga mihring nuai 28 awm zinga nuai khat vel chu sorkar hnathawk an nih thu a sawi a, mi nuai 28 tana ṭha tur an ngaihtuah a ṭul zawk thu a sawi. Hnathawktu nawrh huaihawt mek chuan tuna an hlawh pawh hi an kham tawk thu sawiin hna an thawh duh loh chhan chu hriatthiam a har thu a sawi.

Mi ṭhenkhawt chuan state sorkar hian sorkar hnathawk hotu ṭhenkhat chu hna an thawh duh loh avang hian man an tum niin an sawi ve mek bawk.

Nawrh huaihawttu zinga an hotu pakhat chuan sorkar lam aṭangin inbiakna nei tura sawmna an dawn loh thu sawiin media hmanga sawmna chu an pawm theih loh thu a sawi.

Deputy chief minister Yumnam Joykumar chuan hnathawk te chu an nawrh avanga an hna an ṭhulh chuan hlawh pawh pek an ni dawn lo tih a lo sawi tawh bawk. Joykumar hi finance portfolio changtu a ni bawk a, hnathawkte thil phut hi tihhlawhtlin a nih theih nan kumtin cheng vaibelchhe 1, 400 tal fund an neih belh an ngaih dawn thu sawiin chu chu thil harsa tak a nih thu a sawi.

Biren Singh pawhin sorkar laipui aṭanga pawisa lo kal hmanga hnathawk te hlawh pek an nih avangin 7th Pay Commission hmang turin eng fund mah an dawn belh lo tih a sawi a ni.