Tripura-ah Bangladesh Independence Day hmang

Bangladesh Inde­pendence Day leh Na­tional Day chu Thawhṭanni khan Tripura hmun hrang hrangah hman a ni. Pathianni aṭang khan hemi pual hian hun hman a ni a, March 25, 1971-a martar-te pualin mawmbati chhitna hun hman a ni bawk.

He hun hi Assam-a Guwahati dawt chiaha hmarchhaka second dip­lomatic mission changtu Bangladesh Assistant High Commission chuan a buatsaih a ni.

Tripura Chief Minis­ter Biplab Kumar Deb, University of Grants Commission of Bangla­desh Chairman Abdul Mannan, leh Dainik Sambad Editor Pradip Datta Bhowmik te pawhin he hun hi hmanpuiin thu te an sawi bawk.

Bangladesh Assistant High Commissioner Shakhawat Hossain chuan Tripura mipuite chuan Bangladesh laka rilru ṭha tak an put thu a sawi. March 26 leh December 16-a Bangladesh national day an hman apiangin Tripura mipui tam takin an hmanpui ve ṭhin thu a sawi a, Tripura mipuite chuan Bangladesh chu ṭan­pui an ngaih apianga an ṭanpui ṭhin thu a sawi a ni.

Bangladesh Inde­pendence Day hmanna hunah hian Tripura mipui tam tak bakah zaithiam eng emaw zatin hun an hmang.

Tun hmaa East Pakis­tan ni ṭhin, Bangladesh hian March 26, 1971 khan Independece an puang a, Bangabandhu Mujibur Rehman chuan Pakistan lakah guerilla war a puang a ni. He indonaah hian Pakistan sipai 93,000 chu Dhaka-ah December 16, 1971 khan an inpe a ni.

India hi Bangladesh sovereign nation a pawm­tu ber a ni bawk a ni.