Harsa takin Zverev a chak

Mipa tennis player beiseiawm Alexander Zverev chuan set hmasa ber a hloh hnuah David Ferrer chu 2-6, 6-2, 6-4 in a hneh hram. German star hian vawiin chawhma lamah Miami Open last 16-ah Nick Kyrgios a hmachhawn leh nghal ang.

Kum 20 mi Zverev hian season hmasa khan singles title panga a la a, heng zingah hian ATP Masters pahnih a tel. Kuminah erawh beisei angin a la khel chhuak lo, Miami Open hi a tan bul ṭan thar theihna hun ṭha a ni.

World number 5 Zverev-a hmachhawn tur Nick Kyrgios hian Fabio Fognini chu 6-3, 6-3 in a lo hneh ve bawk a ni. Australian player Kyrgios chuan, "Zverev hian thiamthil a ngah a, court chhungah a hmang ṭangkai thei hle bawk, tuna kan inkhel tur pawh hi a awlsam lo hle ang," tiin a sawi.

Inkhel dangah Fernando Verdasco chuan 3-6, 6-4, 7-6(4) in Thanasi Kokkinakis a hneh a, Spanish player hian a hnam pui Pablo Carreno Busta a hmachhawn leh dawn. Carreno Busta, Kevin Anderson leh seeded pawh chang phak lo Frances Tiafoe te pawhin hnehna an chang ve bawk.