Congress-in HPCL paper mill-a thawkte chhawmdawlna pek phut

Assam Congress chuan state sorkar hnenah Hindustan Paper Corporation Limited (HPCL) paper mill pahnih tihtawp taka thawktute chhawmdawlna pe turin a phut.

Congress MP Prad­yut Bordoloi chuan September 3 khan HPCL Liquidator Kuldeep Verma chuan paper mill-a thawk mi 900 te chu ni 15 chhunga an quarters chhuahsan tura hriattirna a tihchhuak tih sawiin, hei hi an dem thu leh thil tihawm lo tak, thawktute chunga lainatna an neih lohzia leh human rights palzutna a ni, a ti.

State sorkar chuan thawktute harsatna tawhte hi hriatthiampui a, chhawmdawlna a pek an phut bakah, an hlawh batsakte pawh pe tlak vek turin an phût thu Bordoloi chuan a sawi. Hnathawktute hi thla 56 zet hlawh pek an ni tawh lo niin a sawi.

Assam Pradesh Cong­ress Committee (APCC) president Bhupen Kumar Borah chuan HPCL-in Nagaon leh Cachar paper mills a siama thawktute harsatna buaipui tur hian September 4 khan Employees’ Redressal Committee a din a, chairman-ah MP Bordoloi hi ruat a ni. Committee member-te hian Jariroad-a Nagaon Paper Mill hi an tlawh tawh a, thawktute kawmin an harsatna hrang hrangte an lo sawipui a, state sorkar hnenah vawi tam tak industry-te hi tuaithar leh tura an ngenna a hlawhchham thute pawh an lo hrilh. Bordoloi chuan he mill-a thawk zinga 93 chu thla 58 liam ta chhung an thi niin a sawi bawk.

Nagaon leh Cachar Mills-a Joint Action Committee of Recognised Union (JACRU) chuan thuneitute hnenah quarters chhuahsan tura hriattirna an tihchhuah chu sut leh turin an ngen bawk a ni.

Paper Mill pahnihte hi kum 2015, October thla leh 2017, March thla aṭang khan hna an thawk chhunzawm tawh lo a ni. Mahse BJP chuan kum 2016-a state sorkarna a siam hnu leh, kumin assembly inthlan dawna a campaign-naah khan heng paper mill-te hi tihnun thar leh a tiam a ni.