Covid-19 : Assam-in Janata Bhawan tlawh khap
Assam sorkar chuan an state-a Covid-19 darh tur lak invenna atan Nilaini aṭang khan mipui nawlpui tan state secretariat, Janata Bhawan tlawh a khap.
State sorkar hian vantlang hmun leh office-ahte punkhawm khapna a lo siam tawh bawk a, hemi hnu hian March 31 thleng state secretariat tlawh tumte tana e-pass a pek pawh a tihtawp leh ta a ni.
Secretariat Administration Department commissioner leh secretary, M Angamathu chuan secretariat-a kal ngaite chu telephone emaw, email emaw hmangin officer an hmuh duhte hming thehluh hmasa tura tih an nih thu a sawi.
Ministers' Colony pawh March 31 thleng atan mipuite tan khar a ni bawk. Minister private secretary-te chuan minister-in phalna a pekte chauh hnenah pass an pe thei rih dawn a ni.
Assam sorkar chuan Nilaini aṭang khan bar, pub, night club, beauty parlour, saloon (unisex) te chu thupek awm leh hma khar turin a ti bawk. District tina DC te bakah Superintendent leh Deputy Superintendents of Excise-te chu sorkar thupek kengkawh tura hma la nghal tura hriattir an ni bawk.
Meghalaya-in tourist spot khar
Meghalaya sorkar pawhin Nilaini aṭang khan an state chhunga tourist spot hrang hrangte a khar.
Sorkar thuchhuah chuan tourist spot hrang hrang, park leh recreational area-te huam telin March 31 thleng atan khar a nih thu a tarlang. Chief minister Conrad K Sangma hoin Nilaini khan Covid-19 laka invenna tura hmalakna hrang hrangte an thlir ho a, he meeting-ah health minister AL Hek leh home minister Lahkmen Rymbui te pawh an tel. CM chuan video conferencing hmangin district tina deputy commissioner leh medical officer-te chu hma lak dan tur a hrilh a, an district-a lut apiangte chu uluk taka screening lo neihsak zel turin a ti.
Sangma chuan, "He hri leng mek hi khawvel ram hrang hrang leh India ram hmun tam takah buaipui mek a ni a, lo ngaih hoh viau chi a ni lo. Hemi rual hian chiai buai phahna tur erawh a ni lo," tiin a sawi. State sorkar chuan ram chhung hmun dang leh ram pawn lam aṭanga an state-a lutte chu toll free helpline kaltlangin deputy commissioner hnenah in report vek turin a ngen.