Assam-ah detention centre paruk a awm : Home ministry
Ministry of Home Affairs (MHA) chuan Lok Sabha inkhawmah Assam-ah mi 3,331 awm theihna detention centre paruk a awm thu a sawi. Trinamool Congress MP Nusrat Jahan Ruhi zawhna a chhannaah, home minister chuan Assam-a detention paruk - Tezpur (mi 797 awm theihna), Silchar (497), Dibrugarh (680), Jorhat (670), Kokrajhar (335) leh Goalpara-ah mi 370 chin awm theihna a awm thu a sawi a ni.
Home ministry chuan Matia, Goalpara-ah mi 3,000 len theihna tur detention centre sak mek a nih thu a tarlang bawk. Nusrat hian nikum chhung khan hmarchhak bial, a bikin Assam-a National Register of Citizens (NRC) detention camp-a thi zat a zawh bawk. Hei hi chhangin, MHA chuan NRC detention camp/centre a awm loh thu sawiin, Assam-a foreigner/convicted foreigner dahna detention centre-ah erawh mi paruk an thih thu a sawi. Nikum chhung khan National Human Rights Commission (NHRC) team pathum chuan detention camp hrang hrangte hi tlawh kualin, heng hmuna ram dang mi awmte chu an kawm thu a sawi bawk a ni.