MSF-in Manipur CM bang turin phut

Manipuri Students’ Federation (MSF) chuan Chief Minister N Biren Singh-an Gujarat-a Por­bandar-a Madhavpur Fair neihnaa a thusawi danah an lungawi lo tih sawiin, chief minister a nihna aṭanga bang turin an phut.

MSF thuchhuah chuan, Porbandar-a ni li awh Madhavpur Fair hawnna-a thu a sawiah, CM Singh hian Lord Krishna hun lai chuan Arunachal Pradesh, Assam leh Manipur tihte a awm hrang lo a, hmarchhak pum chu hmun khat angin a awm a ni, tiin a sawi.

CM hian hmarchhak bial chu Lord Krishna hun lai aṭangin India peng pakhat a ni tawh tiin a sawi a, hei hi duh loin MSF chuan Imphal-a Tidim Road-ah lungawi lohna an lantir zui nghal a ni. MSF member-te hian Tidim road (Imphal-Churachandpur Road) chu darkar khat vel dangin, Singh-a thusawi dana an lungawi lohna thu te an aupui bawk.

MSF president Ngariyanbam Milan chuan CM Singh-a thu­sawi chuan Manipur history a tidanglam vek chauh a ni lo a, sorkar laipui laka hamṭhatna leh duhsakna hmuh a duh luat vangin Manipur ram pum chu a hralh a ni, a ti. Singh-an India leh Hindutva chanchin leh Manipur chanchin insuihzawm tir a tum chuan dik lo takin Manipur chanchin a pho lang zawk a ni, a ti. Hei vang hian chief minister chu Manipur chanchin dik tak pawh hrechiang loah puhin, chief minister a nihna aṭanga bang turin an phut a ni.

MSF chuan CM chuan a thusawi chungchang sawi­fiah turin an phut bawk a, hei hi a ti lo a nih chuan Manipur mipuite nena thawkhoin, nawrh an huaihawt tur thu an sawi bawk.

South East Asia Cultural Organisation (SEACO) pawhin CM thusawi hi an dem thu an sawi bawk a, an pawl chuang mi tumahin an ram chu 'Hindu ram' a an siam an remti ngai dawn lo tih an sawi. CM thusawi chu Meitei hnamte hmusitna lian tak nia an ngaih thu an sawi bawk a ni.