Hmarchhak tan 100% centrally funded development project siam

Sorkar laipui chuan hmar­chhak bial tihhmasawnna turin central sorkarin a senso a tum vekna tur, 100% centrally-funded development project a siam.

Minister of State for Deve­lopment of North Eastern Region (DoNER) Jitendra Singh chuan Ningani-a cabinet meeting neih zawh hnua chanchin thar lakhawmtute a kawmnaah he thu hi sawiin, tlutlukna chhinchhiah tlak a nih thu a sawi. Sorkar laipui chuan he development project atan hian cheng vaibelchhe 4,500 a dah a ni.

Hmarchhaka project thawh mekte chu a hmaa kalpui a nih dan, sorkar laipui leh state sorkarten a senso an intum semna, 90:10 angin kalpui chhunzawm an ni ang a, mahse project thar te erawh sorkar laipui tum vek tur a ni dawn thung a ni. Tuna project thawh mekte chu kum 2020 a zawhfel hman tum an ni.

DoNER minister chuan 100% centrally funded deve­lop­­ment scheme chu mau sawng­bawlna lamte, tourism leh higher education bakah medical education lamah thlurbing bik a nih tur thu a sawi.

Singh chuan, "Northeast Road Development Scheme siam a nih tur thu pawh kan lo puang tawh a, hei hi hmar­chhak bial bik tana kawng­pui siamṭhatna tur scheme duan hmasak ber a ni. State pahnih inkalpawhna kawngte chu ngaihthah an ni ṭhina, mahse tunah chuan sorkar laipui chuan heng kawngte hi a enkawl dawn a ni," a ti.