Assembly-ah Manipur minister Shyamkumar luh phalsak lo

Khuahkhirhna tawk mek, Manipur minister Thounaojam Shyamkumar chu Constitution Article 142 hmangin Legislative Assembly-a a lut khapsak a ni. 

Congress party aṭanga BJP-a inlet, Shyamkumar hi minister a nihna hlihsak nghal a nih thu Justice RF Nariman kaihhruai Supreme Court bench thupek chuan a tarlang bawk. Justice Nariman chuan, "Constitution Article 142 hnuaiah Shyamkumar hi court thupek dang tihchhuah a nih leh hma chuan Legislative Assembly-a a luh khapsak a ni. Cabinet minister a nihna pawh hlihsak nghal a ni," a ti. 

Assembly speaker Y Khem­chan Singh-a'n Supreme Court-in Shyamkumar disqualify tura ngenna thehluh chungchanga thutlukna, thla khat chhunga tifel tura hun a pek chhunga a tihfel hman loh avangin, court chuan he thupek hi a siam ta a ni. 

Kum 2017 inthlana  Congress ticket-a tling, Shyamkumar hian Manipur-a BJP kaihhruai sorkar a din hnuah BJP hi a zawm a, forest and environment minister-ah  dah zui a ni. Congress chuan Speaker hnenah hian petition thehlutin, Shyamkumar disqualify turin an ngen a, mahse Speaker chuan action a la duh lo a ni.