Tripura-ah BJP worker-ten media house 5 an bei

Tripura khawpui, Agartala-ah Nilaini khan BJP hruaitu leh worker nia hriatte chuan media house panga bakah eptu party, CPM party office pahnih beiin motor-te an hal.

Nilaini khan rorellai, BJP chuan rally an nei a, rally neih hnuah pawikhawihna hrang hrang hi a thleng zui ta a ni. Media office an beihte hi PB 24, Pratibadi Kalam, Kalmer Shakti, Daily Desharkatha leh Duranta TV office-te an ni.

Sub-divisional police officer Ramesh Yadav chuan pawikhawihna thlengte hi CCTV footage aṭanga an endik thu sawiin, pawikhawihtute chu man an nih thuai tur thu a sawi. BJP hi rally neih phalna pek an ni lo tih a sawi bawk.

BJP activist-te hian Gomati-a local channel Duranta TV office an hal a, kangṭhelhtu pawl kal tumte chu an lo dang bawk niin editor Ayub Sarkar chuan a sawi. He thil thleng hi district police leh local police station lam aṭanga an rawn ngaihven loh thu a sawi.

Hetih lai hian BJP state president Manik Saha chuan rally an neihlai hian CPM worker-te West Tripura division office aṭangin lungin an lo tawng niin a sawi a, hei vang hian party worker-te thinrim chuan an office hi hresualin an bula newspaper pahnih leh TV channel office chu luhchilhin an bei ta a ni, a ti.

Pratibadi Kalam chanchinbu publisher leh editor, Anal Roy Chowdhury chuan police station-ah thubuai thehlutin, BJP hruaitu leh worker-te hian an office-ah luhkhungin CCTV connection chu a tichhia a, hemi hnu hian an bungruate suasamin an document-te an laksak niin a sawi. Journalist-te pawh kut an thlak a, an zinga pahnih chuan hliam an tuar tih a sawi bawk. BJP worker-te hian office kawta bike pahnih leh car pakhat chu an halsak bawk. Hemi hnu hian CPM district office chu luhchilhin an bei leh a, motor pahnih an halsak leh bawk a ni.

Tripura-a rorellai, BJP mi leh sate hian CPM headquarters leh Daily Desherkatha office pawh bei zui lehin, motor panga leh bike pakua an hal a, Bishalgarh-a CPM party office an hal sak bawk.

Media house hrang hrang beih a nih vangin Tripura-a media organistion leh journalist-te an lungawi lo hle a, Agartala Press Club Secretary Pranab Sarkar chuan police-te hnenah a rang thei ang bera pawikhawihtute chu man tura phutin, an man thuai lo a nih chuan rorelna dik phuta nawrh huaihawt an tum thu a sawi. BJP mi leh sate thil an tihchhiatsakte chu zángnadawmna pe turin sorkar an phut bawk a ni.