UNWTO Best Tourism Village atan Meghalaya-a Kongthong khua nominate

World Tourism Organistion (UNWTO) in Best Tourism Village a thlan turah Meghalaya-a whistling village tia sawi, Kongthong khua chu nominate a ni.

Kongthong khua bakah India rama thingtlang khaw pahnih dang, Telangana-a Pochampally leh Madhya Pradesh-a Ladpura Khas-te chu nominate an ni bawk.

Kongthong khua hi an hmanlai kalphung danglai tak an la zawm avangte, an khaw hmunhma hi a mawi avangin khualzinte tlawh pawh a hlawh hle.

He khuaah hian nau piang thar a awm apiangin a nuin naute pual bika nau awihna tur, lullaby a phuah ṭhin. Nu hian a pai lai aṭangin a nau awihna hla tur hi a ngaihtuah lawk a, a thu tel loin a thluk chauh an siam ṭhin a, hei hi hriat awlsam nana tih a ni. Nau chu a pian veleh a nuin a puala nau awihna tur a phuah chu puitlingte chuan lo sain hei hi a dam chhungin a pual bik hla a ni zui ṭhin a, hemi thluk hmang hian hriat zui an ni ṭhin. Hei hi hmanlai aṭanga an lo tih dan an chhawm zui zel a ni.

Kongthong khua hi East Khasi Hills district-a awm niin, state khawpui Shillong aṭanga chhim lam km 60 vela hlaah a awm a ni. He khuaah hian mi 700 vel an cheng.