Brahmaputra luiah khualzin phur lawng pahnih insu

Assam-a Brahmaputra luiah Nilaini tlai khan khualzin phur lawng pahnih an insu a, mi pakhat a thi a, mi dang 30 vel chin hriat lohin an awm mek.

Lawng insutna hmun hi Jorhat-a Nimati Ghat-ah a ni a, heng lawng pahnihah hian mi 200 vel an chuang nia sawi a ni. Lawng pakhat zawk hi Inland Water Transport department lawng a ni a, Majuli aṭanga Nimati Ghat panin mi 120 vel a phur a ni. Tlai dar 4 vel khan an lam pana kal lawng pakhat nen insuin an let zui a ni.

Chetsualna thlenna hmunah hian state disaster response force (SDRF) leh national disaster response force (NDRF) official-te chu kalin chhanchhuah hna an thawk nghal a ni. Mi 100 chhanchhuakin an zingah hian naute pawh a tel.

He thil thleng vang hian state sorkar chuan inland water transport department official pathum a suspend nghal a ni.

Chief minister Himanta Biswa Sarma chuan Majuli leh Jorhat district thuneitute hnenah theihtawp chhuaha chhanchhuah hna thawk nghal turin a hriattir a, union home minister Amit Shah pawhin biain a ṭul anga puih an inhuam thu a hrilh tih a sawi.

Chief Minister chuan Nimati Ghat, Jorhat-a lawng chetsualna thleng chuan a rilru a ti na hle tih sawiin, state minister Bimal Bora chu Majuli pan nghal tur leh, thil awmdan a hmuna thlithlai nghal tura a tih thu a sawi. Vawiinah amah ngei pawh Nimati Ghat-ah a kal dawn tih a sawi bawk.