Lawng chetsual chungchangah Assam-in criminal case ziak lut dawn

Assam sorkar chuan Nilainia Brahmaputra luia lawng pahnihte insut chungchangah criminial case a ziak lut dawn. He chetsualna thlengah mi pahnihin nunna an chan a, nimin tlai lam thleng khan chin hriat lohin mi 36 an la awm.

Chief minister Himanta Biswa Sarma chuan criminal case ziak lut turin thupek a tichhuak a, Assam cabinet chuan lawng chetsualna thlen dan chhui chiang turin additional chief secretary Marinder Singh chu ruatin, thla khat chhunga report thehlut turin a ti bawk.

Jorhat district-a Nimati Ghat bulah khualzin phur lawng pahnih, Majuli lam pana kal private lawng leh sorkar enkawl lawng chu Nilaini khan insuin, lawngte hi an pil zui a ni. Ningani zan thleng khan lawng chesuala chuang, chin hriat loha awmte zawn hna hi thawh chhunzawm a ni.

Ningani khan CM Sarma chuan Majuli leh Jorhat tlawhin, lawnga chuangte chhanchhuah hna thawh a nih dante a enpui a, damdawi-ina hliam tuar dahte chu a kan nghal bawk. Sarma chuan, "He luiah hian lei dawh a ni a, hemi chungchang pawh hi sorkar laipui ka sawipui nghal a ni. Ruahmannate pawm a nih hunah November thla aṭang hian an thawh ṭan nghal theih beisei a ni. Kum li chhungin lei hi dawh zawh hman tum a ni a, hnathawh dante enfiah ṭhin turin ministerial group pawh din a ni ang," a ti.

Jorhat-Majuli inkara lei dawh enfiahna kawnga mawhphur turin cabinet chuan finance minister Ajanta Neog a ruat nghal bawk. CM chuan Jorhat-Majuli inkarah hian single-engine private boat kal khap nghal a nih thu a sawi bawk.

CM chuan Jorhat-Majuli inkarah sorkarin lawng a tlantir hun hi a mumal loh avangin mipuite pawhin private lawngte chu a him ṭha tawk loa ngaih ni mah se an chuan a ngaih phah fo nia sawi chu siamṭhat an tum tih a sawi. "Jorhat leh Majuli magistrate-te chuan lawng kal hunte hi an enfiah ṭhin tur thu sawiin, ni 5-10 hnuah an siamṭha tawh ang," a ti.

He chetsualna thleng vang hian inland water department-a official pathum chu an hnaa inthlahdahah puhin suspend an ni tawh bawk.

Assam Pradesh Congress Committee (APCC) president Bhupen Bora chuan Ningania press conference a neihah private lawng leh sorkar lawngah hian safety kits - life jacket leh swimming tube-te pawh a awm lo niin a sawi. Lawng chetsualna thlenga thi chhungte chu zangnadawmna pe turin sorkar an phut tih a sawi.