Tripura-ah central force dah lut

Tripura-a politics vanga inbeihna a thlen avangin sorkar laipui chuan state security force-te pui turin central force a dah lut a, state chhung hmun hrang hrangah duty tir an ni.

Nilaini khan district hrang hrangah BJP leh CPM worker-te an intibuai a, Agartala-a CPM main office pahnih chu BJP mi leh sa nia puhten an hal a, office kawta motor dingte pawh an halsak bawk. Bishalgarh-a CPM office pawh bullzoder hmangin an tihchhiatsak bakah an hal zui bawk.

CPM general secretary Sitaram Yechury chuan Tripura-a an party mi leh sate beih an tawh fo chungchangah sorkar laipui chu inrawlh tura ngenin, prime minister Narendra Modi hnenah lehkha a thawn a ni. BJP chu mipuite thlawpna a neih ṭhat loh chhoh tak avangin buaina an siam chho zel niin CPM chuan an sawi a,hetih lai hian BJP chuan an party rally buatsaihnaa telte chuan CPM mi leh sate hi an bei hmasa niin an sawi ve thung.

Inspector general of police (law and order) Arindam Nath chuan buaina chhuahna hmunah hian Tripura State Rifles bakah Central Reserve Police Force (CRPF) duty tir an ni tih a sawi.