Environment tan a him em tih hriatchian hunah chauh Oil palm chin hna kan kalpui ang : Meghalaya CM

Meghalaya chief minister Conrad K Sangma chuan sorkar laipuiin hmarchhak biala oil palm plantation kalpui a tumnaa an state thlan tel a nih chungchangah, an state environment tan a him em tih leh, mipuite tana ṭha tur a ni tih an pawmtheih hunah chauh oil palm chin hna hi an kalpui dawn tih a sawi.

Shillong-a chanchinbu mite a kawmnaah CM chuan he thu hi sawiin, "Sorkar laipui chuan rawtna hi a rawn nei a, mahse kan zirchian phawt hnuah eng ang chinin nge kan kalpui dawn tih kan hre chauh ang," a ti.

Eizawnna kawng a hawn sak dawn avangin hmarchhak state dang, oil palm chin duh tak tak pawh an awm tih Sangma chuan a sawi a, mahse an state bikah chuan oil palm chin hian eng angin nge environment a nghawng dawn a, an ram ngawte a tihkiam phah dawn em tih an zir chiang dawn tih a sawi. Ram ruak, forest area-in a huam lohte a awm chuan a chinna atan a hman theih dawn a, hetiang a awm a nih chuan a ṭangkai dawn hle thung a ni, tiin a sawi.