Assam-ah thla 6 dang AFSPA pawtsei

Assam sorkar chuan Armed Forces Special Powers Act (AFSPA) hnuaia an state 'disturbed area'-a puan chu thla ruk atan a pawtsei leh.

Inrinni liam takhan sorkar chuan thuchhuah siamin, August 28 aṭanga chhiarin thla ruk dang AFSPA hnuaiah pawhsei a nih thu a sawi a ni. Mahse he dan pawhsei a nihna chhan erawh a sawilang lo. Mahse tun hnaia Assam-a Dima Hasao district-a helpawlte chuan truck eng emaw zat halin mi panga an kaphlum chu he dan pawhsei a nihna chhan pakhat a nih rin a ni.

Kumin February thla khan, assembly inthlan neih hmain Assam governor Jagdish Mukhi chuan Assam state pum chu February 27 aṭangin thla ruk chhung atan 'Disturbed Area'-ah a lo puang tawh a ni.

Sipai hnena thuneihna sang tak pekna, AFSPA hi hmarchhak state dang, Nagaland, Manipur bakah Arunachal Pradesh hmun ṭhenkhatah pawh hman a ni a, mahse tualchhung mipui leh pawl hrang hrangte'n an duh lo hle. He dan hnuaiah hian sipaite chuan phalna nei kher loa mi man leh dap te bakah ,thubuai siamsak loa mi hren theihna te an nei a, dan sakei tia sawi a ni fo ṭhin.

Assam-ah hian kum 1990, November thla khan AFSPA hi hman a ni a, sorkar laiten an ennawn hnuah thla ruk dang atan an pawtsei chhunzawm zel a ni.