Tripura CM-in buaina chawkchhuakah CPI-M a puh

Tripura chief minister Biplab Kumar Deb chuan tunhnaia an state-a political party, a bikin rorellai BJP leh eptu, CPI-M te inkara buaina chhuakah CPI-M lam chu buaina chawk chhuaktuah a puh.

Chief Minister Deb chuan CPI-M hruaitu leh chief minister hlui, Manik Sarkar chuan September 6 khan Sonamura-ah drug mafia hote hruaiin, BJP worker te bei turin a fuih niin a sawi. Eptu party hi politics lama an dinhmun tlahniam zel avangin an beidawng chuan Tripura tualchhung dinhmun tihbuai an tum a ni, a ti.

BJP worker-te beih an nih avang hian an zinga eng emaw zat chu hliam tuarin damdawi-inah enkawl mek an ni a, ṭhenkhat dinhmun chu a tha lo hle a ni, tiin CM chuan heng buainate hi CPM lam ruahman vek a ni thu a sawi bawk.

Hetih lai hian CPI-M chuan kar liam ta khan BJP worker-te chuan CPI-M office eng emaw zat leh media house-te an bei a, motor-te an hal tih sawiin state chhunga thil thleng mek chungchangah prime minister Narendra Modi chu inrawlh tura ngenin CPI-M general secretary Sitaram Yechury chuan lehkha pawh a lo thawn tawh a ni.

Chief Minister chuan media house-te beih a nih chungchangah pawikhawihtute chu tute nge an nih tih chhuichhuah a, hremna pek an nih ngei tur thu a sawi. Democracy ramah media chu an pawimawhin mitinin an zah tur a ni, a ti bawk.