Tripura CM-in Sabroom-ah hospital thar a hawng

Tripura chief minister Biplab Kumar Deb chuan Pathianni khan an state chhim lama Sabroom khuaah khum 100 awmna hospital thar a hawng.

Sabroom Sub-Divisional Hospital hi cheng vaibelchhe 13.5 senga sak a ni.

Health ministry changtu ni bawk, CM Deb chuan a kaihhruai sorkar chuan state mipuite healthcare service ṭha leh rintlak pek zel a tum thu sawiin, hospital tharah hian specialist doctor pawh dah nghal a ni tih a sawi. Ni 39 liam ta chhung khan sorkar chuan health sector lama indaih lohna phuhruk turin Tripura Health Service hnuaiah doctor 256 lak thar an ni tih a sawi bawk.

Chief Minister hian hospital-a unit hrang hrangte chu fangkualin, oxygen plant siamna tur lungphum a phum nghal bawk a ni. CM hi an state-a cham mek, union minister minister of state for health and family welfare Dr Bharati Pravin Pawar bakah MLA Sankar Roy leh official dangten an ṭawiawm a ni.

CM leh union minister-te hian Sabroom Nagar Panchayat programme buatsaih hmanpui bawkin, state-sponsored welfare scheme hnuaiah hamṭhatna dawngtu, hmeichhia 34 te hnenah puanṭhuina khawl leh mi dang 25 hnenah bicycle an sem a, wheelchair leh Ayushman Bharat card-te pawh a dawngtu turte hnenah an sem nghal bawk a ni.

Deb chuan border town tihhmasawnna tur hian hma a la zel tih sawiin, Asian Development Bank (ADB) hnuaiah Rs vbch 80 project hmangin hna an thawk mek tih a sawi.

Union minister Der Bharati Pravin Pawar hi ni thum cham turin Inrinni khan Tripura hi a thleng a, state chhunga health infrastructure leh project thawh mekte a endik a ni. Agartala-a Atal Bihari Vajpayee Regional Cancer Centre (ABVRCC) tlawhin Central Sterile Supply of Deparmtent (CSSD) a hawng nghal bawk.

Minister chuan Prime Minister chuan mitinten hriselna ngai pawimawhin, health service ṭha an dawn chu a ngai pawimawh hle tih a sawi a, hemi atan hian Tripura pawhin health service leh infrastructure ṭha zawk an neih theihna turin theihtawp an chhuah zel dawn tih a sawi.