Manipur inthlanah NPP in seat tam zawkah chuh a tum

National People's Party (NPP) president leh Meghalaya chief minister Conrad Sangma chuan nakkuma Manipur assembly inthlan neih turah NPP chuan seat tam zawkah chuh a tum tih a sawi.

Manipur assembly inthlan neih tur atan hian party hrang hrangte chu an inbuatsaih ṭan a, central lama hruaitute pawhin an tlawh fo a ni.

Conrad Sangma hi Inrinni liam ta khan Manipur-ah hian zinin, Imphal-ah NPP party hruaitute leh worker-te kawmin, inthlan kaihhnawih thil pawi­mawh hrang hrangte a sawipui. Sangma chuan hmarchhak bial leh Manipur-a an party dinhmun sawhnghehna turin Manipur inthlan neih tur chu NPP tan chuan a pawimawh hle tih a sawi.

"Kan party pawh kan insawhngheh chho zel a, inthlan lo awm tura inbuatsaihna ṭha tak kan neih theihna turin state committee-te nen meeting kan nei a ni. NPP hian youth wing unit thar a din a, hei hi constituency hrang hrang aṭanga zawmtu pawh an awm tawh. Kan party zawmtu pawh hi an pun chhoh zel kan beisei a ni," a ti.

Inthlan neih tur NPP candidate nih duh pawh eng emaw zat an awm tawh tih sawiin, thutlukna nidangah an la siam tur thu Sangma chuan a sawi bawk. Seat tam thei ang berah chuh an tum a, mahse inthlan hma chuan eng party mah thawhpui an tum lo tih a sawi bawk.

Manipur-a BJP kaih­hruai ṭangrual sorkarah NPP hi a tel mek a, MLA pali a nei a ni.