Manipur : Political party-te'n thupha chawi turin CM phut

Manipur-a political party hrang hrangte chuan Chief Minister N Biren Singh chu an state chungchang dik lo taka a sawi avangin thupha chawi turin an phut.

Chief Minister hian March 27-a Gujarat-a Porbandar-a Madhavpur Mela hawnnaa thu a sawiah, Manipur leh hmarchhak bial chu Lord Krishan hun laia India ram peng pakhat a nih thu a sawi a ni.

Inrinni khan Imphal Congress Bhavan-a news conference an neih­ah, chief minister hlui O Ibobi singh leh Congress hruaitu dangte chuan CM chu thu dik lo a sawi vanga an dem thu an sawichhuak. Ibobi Singh chuan, "BJP CM N.Biren hian hmarchhak bial mipuite leh history tidanglama thu diklo a sawi avangin thupha a chawi tur a ni. Congress party chauh ni lo, state mipuite chuan he tianga thu a sawi hi kan ring ngai lo. CM hian central lama hotute tihlawm a, a mimal dinhmun tihṭhat a duh avangin a nihna hi a hai tur a ni lo", a ti.

Manipur People's Party (MPP) pawhin chief minsiter chu Manipur mipuite hnenah ngaihdam dil tura an phut thu a sawi. CM thusawi duh dan chu thil mawilo leh ṭha lo tak a ni tiin, MPP president Oinam Jugindro chuan a sawi. Biren chu Manipur history zir ṭha leh tura tiin, Manipur chu kum 1949 Setpember 21-a 'Merger Agreement' ziah a nih hnuah chauh India-ah a bet a ni tiin a sawi. Hemi hma hian Manipur chu kum tam tak chhung mahnia ro inrelna ram hran a ni thu a sawi bawk. Chief Minister chu a mawhphurhna pawh hre loah an puh a ni.

Manipur Students' Federation (MSF) chuan chief minister hi a thusawi avang hian an dem thu leh, Chief Minister a nihna aṭanga bang tura an phut thu pawh an lo sawi tawh bawk.