AP ramri-ah sipai dah belh

Sorkar laipui chuan Arunachal Pradesh-a China ramri bulah sipai a dah belh a, venhim hna pawh uluk zawka kalpui a ni.

China leh India sipaite Doklam-ah hun rei tak an inep hnuah, sorkar laipui chuan China ramriah venhimna tihchak nan Arunachal Pradesh-a Dibang, Dau-Delai leh Lohit valley-ahte sipai hi a dah belh a ni. Sipai hotute chuan ramri-a China sipaite chet dan pawh uluk zawka a thli­thlai reng tur thu a sawi.

Sipai hotu chuan Doklam-a inepna a thlen hnuah ramri ven hna chu uluk zawk an kalpui thu a sawi a, thil eng pawh thleng se lo do let tura an inpeih thu a sawi. Official chuan Indian Army chuan Long Range Patrols (LRPs)-a sipaite tihchak a nih thu a sawi. He hmunah hian a hma chuan sipai group tlemte te patrol-a kal tir ṭhin an ni.

Official chuan India nena an inrina bul, a bikin Tibetan bialah infractructure nasa taka tihhmasawn a nih thu a sawi a, hei vang hian India pawhin sipaite chak zawka an chet vel theina tura kawngte an siamṭhat a ngaih thu a sawi a ni. Sipaite hian Kibithu post-a awmte supply pekna turin kea an kal a ngai ṭhin a ni. Mahse Border Roads Organization chuan AP-a China ramri bula kawng eng emaw zat chu siamṭhat tura tih a nih thu a sawi a, heng zingah hian Dibang Valley leh Lohit Valley inkalpawhna pawh a tel a ni.