Hmarchhak tan Swadesh Darshan hnuaiah project 16 siam

Union tourism minister G Kishan chuan a kaihhruai ministry chuan hmarchhak bial tan Swadesh Darshan Scheme hnuaiah tourism sector tihhmasawnna turin project 16 a siam tih a sawi.

Swadesh Darshan Scheme hi sorkar laipuiin tourism tihchangtlun leh tihhmasawnna tura kum 2015-a a siam a ni. Central sector scheme niin he scheme hnuaia project thawhna senso hi sorkar laipuiin a tum vek a ni.

Guwahati-a ni hnih awh, Conference of Tourism and Culture Ministers of North Eastern states a hmanpuinaah Reddy chuan, tourism ministry chuan hmarchhak biala infrastructure , ground capacity leh skills tih­hmasawnte chu a dah pawimawh a, scheme leh flapship programme katlanga marketing lama puih pawh a ngai pawimawh hle a ni a, a ti.

Pilgrimage Rejuve­nation and Spirituality Augmentation Drive (PRASAD) scheme hnuiaiah ministry chuan project eng emaw zat, cheng vaibelchhe 200 hu vel a siam tih sawiin, "Tourism hi ram pum huap pawha thil pawimawh, a bik takin hmarchhak biala socio-economic laka danglamna nasa tak thlen thei a ni," a ti. DoNER ministry hnuaia kum 2021-22 atana hmarchhak state-te tan budget Rs vbc 68,020 dah a nih a, hengte hi ṭangkai leh hlawk taka hman a nih theihna turin state sorkar-te chu rawtna ṭha tak takte thehlut turin a sawm nghal bawk a ni.

Union minister of state for culture, Arjun Ram Meghawal pawhin tourism lam tihhmasawn chu thil pawimawh tak a ni a, hemi atan hian hmarchhak state-te chuan theihna an nei a ni, a ti. Hmarchhak state hrang hrangte chuan danglamna bik tak an nei vek a, hengte hi tourism tihhmasawnna atana hman a ṭul thu a sawi bawk. Infrastructure changtlung zawk neih chuan tourism development lamah pawh nasa takin a pui dawn a ni tiin, tourism sector hmang hian sector dangte pawh puih theih an ni dawn a, hei hi ramin hma a sawn theihna tura tan a ṭangkai dawn hle a ni, a ti.

Union minister of state for tourism and defence Ajay Bhatt pawhin thu sawiin, prime minister Narendra Modi kaihhruaina hnuaiah India chuan sector hrang hrangah hmasawnna nasa tak a hmu tih sawiin, hmarchhak bialte tel lo chuan ram pum huapa hmasawnna chu a thleng thei dawn lo tih a sawi.

Conference hi tourism, culture leh DoNER ministry-te kaihhruainain Thawhṭanni leh nimin khan neih a ni a, hmar­chhak biala tourism tihhmasawnna tur leh a kaihhnawih thil hrang hrangte sawiho a ni. Tourism Ministry leh Indian Railway Catering and Tourism Corporation (IRCTC) chuan hemi kawnga thawkdun tur hian MoU anziak bawk.