Assam-a pawl 22-ten NHPC project duh lohna lantir dawn

Assam-a pawl hrang hrang 22-te chuan Arunachal Pradesh-Assam border-a National Hydroelectric Power Corporation (NHPC)-in 2,000 MW hydropower project an siam chu duh loin, September 20 hian state pumah lungawi lohna lantir an tum.

Asom Jatiyatabadi Yuba Chatra Parishad (AJYCP) leader, Palash Changmai chuan pawl hrang hrang 22-te chuan kawng hrang hrangin lungawi lohna hi lantir an tum a, project thawhna hmun pawh hi dan an tum tih a sawi.

Anti-Bharatiya Janata Party organisation, AJYCP hian kar liam ta Inrinni khan NHPC project chungchangah hian public meeting buatsaihin, mi thiam hrang hrang, geologist leh hydrologist-te chuan Subanbiri lui thlang lama chengte tana he project-in harsatna a thlen theih dante an sawi a ni. AJYCP hruaitu chuan he lui thlang lama cheng leh a nghawng tuartu tur, district palia thingtlang khaw 965 aiawhte pawh berawn miah lohin he project hi thawh chhunzawm a nih thu a sawi bawk.

State pahnih inrina bula mega power plant siam tur dodaltu zingah hian All Assam Students’ Union leh All Assam Adivasi Students' Association pawh an tel a, Inrinnia meeting-ah pawh an pawl aiawhte hi an tel a ni.

Gerukamukh-a 2,000 MW (8×250 MW) Subansiri Lower Hydroelectric project hi kum 2006 khan thawh ṭan a ni a, mahse he project hian a chheh vel leilung a tihchhiat dawn bakah mi tam tak eizawnna thlengin a nghawng dawn nia sawia dodalna nasa tak lantir a nih vangin kum 2011 khan hna thawh lai chu chawlhsan a ni. Mahse nikuma Covid hri leng vanga lockdown puan a nih lai khan project hi thawh chhunzawm a ni. He project thawhna atan hian Rs vbc 20,000 ruahman a ni a, mahse NHPC chuan hna thawh hun hi tihkhawtlai a nih fo avangin sum tam tak an hloh phah tawh tih an sawi.