Manipur : Pistol bo chungchangah mi panga man, IPS Officer suspend

Manipur Rifles camp aṭanga 9mm pistol 56 bo thubuaiah mi panga man an ni tawh a, Indian Police Service Officer pakhat leh police officer dang pali suspend an ni bawk.

Personnel Department thu­neitute chuan Inrinni zan khan thupek tichhuak in Kam­jong Superintendent of Police H. Golmin (IPS) leh Manipur Police service officer - K. Ajit, H. Basulal leh Bikramjit bakah police officer dang pahnih suspend an nih thu an tarlang.

Officer an suspend-te hian sorkar phalna lo chuan station an chhuahsan phalsak an nih loh thu an tarlang bawk.

Ralthuam te hi ruk bo an nih laiin hriat a ni lo a, hetih lai hian FIR erawh thehluh a ni tawh thung a ni. Police-te chuan mi panga an man tawh thu sawiin an mi man te kut aṭang hian pistol pahnih an man thu an sawi ve thung.

Chief Minister N. Biren Singh, Home portfolio chelhtu ni bawk chuan phalna nei lo mi pakhat kut aṭanga pistol man a nih thu a sawi a, pistol an man pakhat zawk erawh hi chu a serial number tihreh a nih avangin zirchian a la ni dawn tih a sawi.

Biren Singh chuan Inrinni khan pistol bo chhui chiang tur hian National Investigation Agency-te chu ngen an nih thu a lo sawi tawh a, heng pistol ruk bo te hi October 2014-a sorkar in pistol 575 a lei zinga mi te an ni.