Tripura State Police-ah Crime Wing din a ni dawn

Tripura sorkar chuan state police hnuaiah crime branch mumal tak din an tum thu tarlangin dan kalha chetna hrang hrang, drugs leh narcotics lam kaihhnawih buaipui tura din a nih dawn thu a tarlang.

Law Minister Ratan Lal Nath chuan Delhi Police crime branch an entawn dawn thu a sawi a, state cabi­net chuan BJP in an elec­tion manifesto-a an tiam angin police hnuaiah crime branch mumal tak din tura thutlukna an siam thu a sawi.

Nath chuan ruihhlo leh pawikhawihnaa in­hnamhnawih hriatchhuah chuan hremna an hma­chhawn ngei dawn thu a sawi a, branch din tur hian Delhi leh Mumbai aṭangin mithiam bikte ngaihdan an la hmasa dawn tih a sawi bawk.

Tripura Cabinet hian kar kalta Ningani khan darkar hnih zet meeting an neih hnuah crime branch din tura thutlukna hi an siam tih a sawi.

Nath chuan political party-te office atana ram pek chin report sorkar thar chuan a mamawh thu sawiin district magistrate-te leh superintendent of police zawng zawng te chu ni 15 chhunga report thehlut vek tura hriattir an nih thu a sawi bawk a, Left front sorkar laia NGO leh institution tana ram pek report zawng zawng zirchian an tum thu an sawi a ni.

Cabinet ṭhukhawm chuan Sarva Siksha Abhiyan hnuaia zirtirtu hna­thawk te term pawh pawt­sei turin thutlukna an siam tih sawiin Nath chuan sorkar laipuiin hlawh a pek theih chhung chu chelh zui zel an tum thu a sawi.