Meghalaya in Climate Adaptation Policy lam hawi dawn : Chief Minister

Meghalaya Chief Mi­nister Conrad K. Sangma chuan Inrinni khan state sor­kar chuan climate change adaptation policy an kalpui ṭan tawh dawn tih sawiin boruak inthlak na­sat avanga harsatna hrang hrang thleng ṭhin tih­ziaawmna tur a nih thu a sawi.

Zirtawpni-a district pali-a thingtlang khaw 50 chuang thlipui leh ruahpuiin a nuai hnu lawkah he thuchhuah hi a siam a ni.

CM chuan boruak lumlet inthlak chu thil tak tak a nih thu a sawi a, hemi chungchang ngaihtuah hi a hun takzet tawh thu sawiin a tihziaawmna tur policy pawh siam a ṭul thu a sawi.

Catchment area hum­himna turin World Bank nena inremna an lo siam tawh angin cheng vai­belchhe 100 chu World Bank kut aṭanga an hmuh ṭep tawh thu a sawi bawk.

Sangma chuan thlipui leh ruahsur nasa avanga harsatna tawk te chu a rang thei ang bera chhawm­dawlna an pek dawn thu a sawi bawk a ni.