Assam-Nagaland border : Select Committee-in meeting hmasa ber nei

Nagaland Legislative Assembly (NLA)-in Nagaland-Assam ramri buaina chungchang buaipui tura a din, selection committee chuan Thawhlehni khan meeting hmasa ber an nei.

Meeting zawhah media mite a kawmnaah, border affairs and horticulture adviser Mhathung Yathan chuan committee chuan Assam nena ramri buaina an neih chhoh dante chu uluk taka an sawiho thu leh, buaina chinfelna tura hma lak dan turte ngaihtuah tura border affairs department pawh tihtur pek a nih thu a sawi.

August thlaa assembly session neihah khan, NLA chuan Assam-Nagaland ramri buaina hrang hrangte enfiah leh zirchiang a, thla thum chhunga sorkar hnena report thehlut turin selection committee hi a din a ni.

Yanthan chuan Thawhlehnia meeting an neih chu a bul ṭanna a ni tih sawiin, ramrite pawh a hmunah tlawhin, sawihona pawh an la nei chhunzawm zel dawn tih a sawi. Assam sorkar leh union ministry-te pawh an be dawn tih a sawi bawk.

"Nagaland chuan ramri buaina hi court inrawlh ngai loin chinfel a, border commission din pawh a lo phut fo tawh a ni. Mahse hetiang ang ni loin court-ah ngaihtuah mek a ni ta zawk a. Mahse kan buaina hi a hmaa kan lo duhdan ang ngeiin court pawn lamah chinfel kan la tum reng a ni," tiin Yanthan chuan a sawi.

Nagaland chief minister Neiphiu Rio chuan Select Committee member pawh ruatbelh an la ni dawn tih sawiin, geology and mining sector lam pawh an inrawlh tel dawn a ni, a ti. Ramriah hian oil operation kalpui mek a nih avangin hemi chungchang pawh ngaihtuah tel a, an hriatchian a ngaih thu a sawi ve bawk.