Meghalaya CM-in dan loa coke factory din khar vek tiam

Meghalaya chief minister Cornad K Sangma chuan an state-a dan loa coke factory dinte chu khar vek a tiam.

Elaka Sutnga-a dan loa coke plant siamte khar phutin Environment Coordination Committee (ECC), Elaka Sutnga, East Jaintia Hills chuan rally an huaihawt a, CM Sangma pawh hmuin an thil phut chungchangte an sawipui nghal bawk. Rally huaihawtah hian tel an ṭhahnem hle a, Elaka Sutnga huam chhunga thingtlanga khaw hrang hrang aṭangin an kalkhawm a ni.

CM an hmuh hnua chanchinbu mite an kawmnaah, committee legal adviser Reading War chuan CM hian phalna nei loa plant dinte chu a rang thei anga kharsak a lo tiam tih a sawi. War chuan environment minister James Sangma-a'n Consent to Operate (CTO) nei loa din, coke plant 30 hnenah khar tura hriattirna pek an nih tawh thu a sawi chungchang pawh sawichhuakin, "Sorkar chuan hriattirna tichhuak ringawt loin a takin hma a la tur a ni. Sorkar chu che chhuak thuai a, heng plant-te hi khar hlen sak ngei turin kan phut a ni," a ti.