Tripura : CM hluiin a bial a tlawh tur BJP-in an dang

Tripura chief minister hlui leh CPI(M) leader Manik Sarkar chuan an state-a rorellai, BJP mi leh sate chuan a constitunecy leh state chhung hmun dang tlawh a tum chu vawi tam tak an dang tawh niin a sawi.

Tripura-ah hian tun hnaiah BJP leh CPI(M) worker-te inkarah hian buaina a chhuak fo a, buaina chawkchhuaktu zawkah an inpuh tawn a ni. CPI(M) general secretary Sitaram Yechury chuan prime minister Narendra Modi hnenah BJP mi leh saten an party member-te kut an thlak leh an beih fo chungchang hi thlenin, inrawlh turin a lo ngen tawh bawk.

Manik Sarkar leh Sitaram Yechury-te hian Nilaini khan press conference neiin, BJP chetdan an dem thu an sawi. Sarkar chuan, "Tripura-ah chuan India Constitution pawhin awmzia a nei lo a ni. CPI(M) MLA hrang hrang, kei pawh tiamin, kan constituency kan tlawh pawh phalsak kan ni lo. BJP-in thla 42 thuneihna an chan chhungin, ka constituency leh state chhung hmun dang ka tlawh tur chu ṭum 15 min dang tawh a ni," a ti.

Left party hruaitu pahnihte chuan Tripura mipuite chu BJP sorkarah chuan an lungawi tawh lo hle tih an sawi bawk. CPI(M) chuan mipuite lungawi lohnate hi a lantir ve avangin BJP chu hetianga an che zel tur hi duh loin, tharum thawh zawngin an che ta ṭhin niin an sawi.

TMC-in Tripura lungawi lohna lantir
Trinamool Congress (TMC) chuan Tripura-a an party-in rally huaihawt an tum chu police-ten phalna an pek duh loh avangin Nilaini khan Agartala-a Gandhi Murti bulah nawrh an huaihawt.

Tripura police-te hian TMC hruaituten September 15 leh 16-a public rally huaihawt an tum chu an phalsak lo a ni. TMC thupuangtu Kunal Ghosh chuan Tripura-a BJP sorkar chu na taka sawiselin, sorkar dawihzep leh chak loah a puh. "Hotel enkawltute hnenah kan party hruaitute awm tir lo turin an vau a, kan party worker-te pawh an inah kalin an vau bawk. Engvangin nge min hlauh em em ni?" a ti.

Ghosh chuan BJP hruaitute chuan Bengal an tlawh chuan ṭha takin an lo lawm a, mahse TMC hruaitu Abhishek Banerjee-a'n Tripureswari temple a tlawh ve chuan kawng lakah ṭum 13 zet beih a nih thu a sawi. September 22-ah rally chu huaihawt leh an tum tih sawiin, phalna an pe duh lo leh a nih chuan high court lamah an thlen tur thu a sawi bawk.