Meghalaya : House aṭangin Congress MLA-te chhuak tau

Meghalaya Legislative Assembly session neih mekah, Nilaini khan Congress MLA-te chu an thil phut tihhlawhtlin a nih loh avangin House aṭangin an chhuak tau a, corridor-ah lungawi lohna thu an aurualpui nghal bawk.

Eptu member-te hian August 13-a NLC hruaitu hlui Cherishterfield Thangkhiew kahhlumnaa police officer inhnam­hnawiha suspend phutin, opposition chief whip Pt Sawkimie chuan hemi chungchang hi hun rei vak lo sawiho an phut thu a sawi. Mahse speaker Metbath Lyngdoh chuan he thil hi chhui zui mek a nih avangin, sorkar aṭanga lehkha a dawn angin an thil phut hi a hnawlsak a ni. Hei vang hian eptu member-te hi lungawi loin an chhuak tau ta a ni.

House pawn lama media mite an kawmnaah, Leader of Opposition Dr Mukul Sangma chuan HNLC leader thah a nih chungchanga fake encounter kalpuitu, police official-te chu sorkarin hum a tum nia a lan thu a sawi. Chief Minister leh Home Minister-te chuan tun thlengin police officer-te hi a la suspend duh lo tih sawiin, Thangkhiew thah a nih dan zalen leh felfai taka chhui a nih theihna turin House-a sawiho chu thil ṭul a ni, a ti.

Speaker Lyngdoh chuan hemi chungchang hi chhui mek a nih avangin Advocate General-in Rule and Procedure of Conduct of Business Rule 59 hnuaiah sawiho hi a khap niin a sawi a, hei vang hian a tan pawh thutlukna siam hi a harsa hle tih a sawi. Mahse CM Sangma chuan democracy-ah chuan eptu member-te chhuah tauh hi a thleng fo niin a sawi a, eptute chuan democracy dan angin an thil phutte auchhuahpui leh, an lungawi lohna lantir turin dikna an nei a ni, a ti. Hemi rual hian sorkar mawhphurh tir vek chu thil dik lo a nih thu a sawi bawk.