Assam CM-in Law College dinna tur lungphum phum

Assam chief minister Himanta Biswa Sarma chuan Nilaini khan Jorhat Government Law College dinna tur lungphum a phum a, he hunah hian hmun dangah pawh law college tam zawk din tum a nih thu hi a sawi a ni.

CM office thuchhuah chuan Dibrugarh, North Lakhimpur, Rangia, Dhubri, Diphu, Silchar, Tezpur, Nalbari, leh Nagaon-ah college din tum a nih thu leh, heng institution-te hi tunlai hmanraw thar ber nena thuam an tum tih a tarlang.

Himanta Biswa Sarma chuan state chhunga law college awm mek zinga a tam zawk chu private organisation-te din a ni tiin, zirlaite tan zirna ṭha zawk leh man tlawm zawk siam turin sorkarin law college hi din a tum a ni, a ti. National Education Policy 2020 chu state chhungah hman tum a ni tih a sawi bawk.

NEP 2020 hmang hian state chhunga high school 3,000 te chu kum 2022-ah senior secondary-ah upgrade vek tum a ni tih CM chuan a sawi. Hei bakah hian university pawh tihpun tum a ni a, development block tinah college din tum a ni tih a sawi.

Jorhat Government Law College hi cheng vaibelchhe 14.74 senga sak a ni dawn a, thla 24 chhunga peihfel hman tum a ni.