AP District pathumah AFSPA pawtsei

Sorkar laipui chuan Thawhṭanni khan Aruna­chal Pradesh-a district pathum leh Assam nena an inri na laia police station pariat in a huam chin area-ah te Armed Forces (Spe­cial Powers) Act thla ruk chhung atan a pawtsei leh.

Ministry of Home Affairs thuchhuah chuan Arunachal Pradesh-a Tirap, Changlang leh Longding district-te bakah Assam leh Arunachal inrina laia police station awm pariat ten an huam chin chu AFSPA, 1958 hnuaiah hmun ralmuang loah puan a nih thu an tarlang.

AFSPA hian security force-te chu thuneihna zau tak pe in hmun ralmuang lo nia puan chinah hian mi kah theihna dan an nei a, arrest warrant tel lo pawhin mi an man thei ang, an rinhlelh zawng te an dap thei bawk a ni.

Thuchhuah chuan Armed Forces (Special Powers) Act, 1958 Section 3 hnuaia tarlan tak te khi hmun ralmuang loah puan a nih thu tarlangin September 30, 2018 thleng thuleh a awm a nih loh chuan AFSPA hi hman chhunzawm a nih dawn thu an tarlang.

Police station pariat te hi West Kameng district-a Balemu leh Bha­lukpong police station, Papumpare district-a Balijan police station, Lower Dibang Valley district-a Roing police station leh Lohit district-a Sunpura police station-te an nih thu Home Affairs thuchhuah chuan a tarlang bawk.

Home Ministry thu­chhuah chuan Arunachal Pradesh-a kum 30 lai AFSPA hman tawh chu hel pawl hrang hrang NSCN, ULFA, NDFB-te thiltih ṭhin avangin thla ruk dang pawhsei leh a nih thu a tarlang a ni.