Meghalaya CM in Tourism Project beisei

Meghalaya Chief Minister Conrad K. Sangma chuan Thawh­ṭanni khan Union Tourism Minister K.J. Alphons nena an inkawmnaah state chhungah “destination tourism” project kalpui tura a beisei thu a hrilh.

Sangma chuan state in touri-sm lama theihna a neih te phochhuah chu sorkar chuan a tum thu a sawi a, farmining community-te tana hamṭhatna siamna tur ngaihtuah a nih dawn thu leh ṭhalaite tana entre-preneurial activity ṭha tak buatsaih chu an tinzawn thu a sawi.

Tourism Minister meeting an neihpuinaah hian Chief Minister bakah state Tourism Minister Metbah Lyngdoh pawh a tel a, state chhunga tourism infrastructure tihchangtlunna tur leh tourism location hrang hrang chungchang te an sawi ho a ni. Sohra leh Umiam bakah Nokrek leh Balpakram-a eco-tourism destination-te chungchang pawh an sawi ho bawk a ni.

Alphons chuan Chief Minister hnenah luxury tourism chawisang tura thurawn pe in state in tourism lama theihna tam tak a neih lam ngaihtuah lehzual turin a chah bawk.

Alphons chuan Meghalaya chu Ministry of Tourism tana hmun pawimawh tak a nih thu a sawi a, tourism chawi lar tura theihtawp an chhuah dawn thu a sawi bawk. Union Transport Minister hnenah pawh inkalpawhna chungchang a sawipui dawn thu a sawi bawk a ni.

Union Minister chuan Chief Minister hnenah hmarchhakah tourism lama hmalakna tur hmun 12 an thlan tawh thu sawiin hetah hian khawvela hmun hnawng ber, Sohra pawh thlan tel a nih thu a hrilh a, hei hi Destination Tourism mission hnuaia hmalakna a nih thu a sawi a ni.

Meghalaya-a cave network-te pawh tihchangtlun an duh thu sawiin khualzin mite hip thei tur ber pawh an nih thu a sawi bawk. Alphons chuan state chhunga tourism project pending zawng zawng pawh a rang thei ang bera an bawhzui dawn thu a sawi.