Assam Congress in SC/SC Act ennawn leh turin PM ngen
Assam Pradesh Congress Committee chuan Thawhṭanni khan Prime Minister Narendra Modi hnenah memorandum thehlutin Supreme Court in SC/ST Act chungchanga thuchhuah a siam chu ennawn leh turin an ngen.
Supreme Court chuan March 20 khan SC/ST Prevention of Atrocities Act chu tinep in sorkar hnathawkte leh private citizen-te chuan SC/ST chungah hleihlenna lantir pawh nise dan phalna lo chuan man an ni thei tawh dawn lo a ni.
Assam Congress chuan Supreme Court thutlukna siam avang hian SC/ST-te chuan an himna tur an hloh dawn niin an sawi a, Assam Pradesh Congress Committee president Ripun Bora chuan PM hnena memorandum an thehluhah chuan sorkar laipui aiawhtu Additional Solicitor General (ASG) chuan SC/ST-te dikna chanvo Supreme Court-ah a hum zo lo tih an ziaklang tih a sawi bawk.
SC/ST Prevention of Atrocities Act chu SC/ST-te tihduhdahna laka vengtu tur leh an dikna chanvo venghimtu a nih thu a sawi bawk.
Supreme Court in SC/ST Act tihnepna kaihhruaina dan a siam chuan chuan hnam hnuaihnung zawk te a venghim zo lo tih Bora chuan a sawi bawk a ni.
Prime Minister hnena memorandum an thehluhah hian APCC Scheduled Caste wing chairman Dr Ramananda Das leh Scheduled Tribe wing chief Ramesh Bordoloi-te pawhin an hming an ziak a ni.
Hetihlai hian Thawhṭanni khan sorkar laipui chuan Supreme Court chu March 20-a SC/ST Act a tihnepna chu ennawn turin a lo nawr ve tawh bawk. Dalit pawl hrang hrangte pawhin Thawhṭanni vek khan SC/ST Act tihnep duh lohna lantir nan hian ‘Bharat bandh’ an lo huaihawt tawh bawk a ni.