Ninong Ering-an Arunachal Pradesh-a AFSPA pawhsei a sawisel

Arunachal Pradesh Lok Sabha MP, Congress MP ni bawk Ninong Ering chuan Thawhlehni khan sorkar laipuiin Arunachal Pradesh-a district pathum leh police station area pariat-a Armed Forces (Special Powers) Act thla ruk chhung atana a pawhsei chu nasa takin a sawisel.

Arunachal East Parliamentary constituency Congress MP chuan Arunachal Pradesh chu state ralmuang tia hriat lar a ni chunga AFSPA an pawtsei chu a hraitthiam loh thu a sawi a, sorkar laipuiin Naga buaina chinfelna tur pawmawm tak a zawn laia district pathuma AFSPA pawhsei a ni chu a hriatthiam loh thu a sawi.

Ering chuan PTI hnenah BJP kaihhruai NDA sorkar policy mak tak tilangchiangtu a nih thu a hrilh.

Sorkar laipui hian Arunachal Pradesh-a district pathum leh Assam border-a police station pariat area-ah AFSPA thla ruk chhung atan pawhsei a nih thu thupek a tichhuak tawh a ni.

Ministry of Home Affairs chuan Tirap, Changlang leh Longding district bakah Assam border-a police station pariat te chu AFSPA, 1958 hnuaiah hmun ralmuang loah a puang a ni.

Armed Forces (Special Powers) Act hnuiah hian security force-te chuan arrest warrant tel lo in min an man thei a, dan phalna tel kher lo in sialai an hmetpuak thei bawk a, mi an dap thei bawk a ni.

Hetih lai hian Lower Siang district-a Likabali police station huamchhungah leh East Siang district-a Ruksin police station huamchhungah chuan he Act hi an hlip thung.