NE Road Connectivity Project tan ODA Loan Rs vbch. 2,500 pek belh

Japan International Coope­ration Agency(JICA) leh India sorkar laipui chuan thawh­dunna thuthlung ziakin, JICA chuan “North East Road Connectivity Project (Phase2)” cheng vaibelchhe 2,500 vel official Development Assistance (ODA) loan a pe dawn. ODA loan kalphungah hian inngaih­hnathiamna a sang hle a, a rulh hun chhung hi kum 30 (inngaihhnathiam hun chhung kum 10 telin) a ni ang.

He Project hian a tum ber chu North Eastern Region (NER) a inkalpawhna tichangtlung tura hmalak a ni. Khawtlanga hmasawnna thlen chu a tum ber pakhat a ni bawk.

JICA aṭanga chhawmdawlna hmang hian Meghalaya-a Natio­nal Highway bypass kawng leh Mizoram-a National Highway 54 bypass kawng siam a ni dawn a, hengte hi Project in a thlur bik tur zingah a tel.

ODA loan chungchanga inremna hi H.E Sujan R. Chinoy, Japan-a India ram palai leh Junichi Yamada, Senior Vice Pre­sident, JICA-ten Iikura House, Ministry of Foreign Affairs, Tokyo-ah an ziak.

Takema Sakamoto,Chief Representative, JICA India office chuan, "Hmarchhak bial hi kawng hrang hranga potential nei ṭha tak a ni a, hmalakna hi peihfel a nih hunah chuan Project hian India hmarchhak bial mipuite chu awlsam zawka zin veivah kawngah nasa takin a tihmasawn dawn a ni" a ti.

Project-ah hian National Highways and Infrastructure Development Corporation Limi­ted (NHIDCL) chu Executing Agency a ni nghe nghe.

National Highway 40 (NH-40) hi Meghalaya ram chhimlama awm niin thlurbing tum lai bik hi Shillong atanga Dawki inkar km 81 a thui a ni. He project hian km 35.8 a thui 2-lane highway a siam tura tihzauh leh km 10.19 a thui 4-lane a siam, km 21.4 a thui bypass kawng thar 5 siamte a huam.

Mizoram chhungah chuan National Highway 54 huam chhunga bypass kawng pali, Aizawl leh Tuipang inkar km 24.04 a tuam ang.